គ្រប់គ្រអប់រំ: បញ្ហាផ្សេងនៃផ្នែកលទ្ធកម្ម សវនកម្ម និងគណនេយ្យ

Sunday, November 4, 2012

បញ្ហាផ្សេងនៃផ្នែកលទ្ធកម្ម សវនកម្ម និងគណនេយ្យ

ជាទ្រឹស្តីដើម្បីទប់ស្កាត់អំពើពុករលួយ ស៊ីសំណូកសូកប៉ាន់ គេត្រូវអនុវត្តការងារលទ្ធកម្មក្នុងការផ្គត់ផ្គង់សម្ភារៈ ការជុសជុល ការសង់សង់ផ្សេងៗ ជាដើម ...ហើយការធ្វើសវនកម្មគឺដើម្បីត្រួតពិនិត្យការចំណាយថាតើវាសមស្របតាមផែនការចំណាយដែរឬទេ ? តើវាត្រូវបានប្រើប្រាស់ត្រឹមត្រូវដែរឬទេ? ។ដំណើរការ និងនីតិវិធីលទ្ធកម្ម និងសវនកម្មនេះ អ្នកវិភាគមិនបានយល់ទូលំទូលាយទេ ប៉ុន្តែក៏មានចំណេះដឹងបន្តិចបន្តួចអំពីវា ដែរ ។ដូច្នេះហើយ យើងខ្ញុំសាកល្បងធ្វើការវិភាគ និងចែករំលែកចំណេះដឹង តាមដែលអាចធ្វើទៅបាន ដោយប្រកាន់គោលជំហថាចែករំលែកតិចតួច ប្រសើរជាងមិនបានចែករំលែកសោះ និងចេះតិចចែកតិច ចេះច្រើនចែកច្រើន។ ក្នុងផ្នែកនេះអ្នកវិភាគ សូមធ្វើការបង្ហាញពី បញ្ហាផ្សេងៗដែលអាចកើតឡើងនៅក្នុងការធ្វើលទ្ធកម្ម សវនកម្ម និងគណនេយ្យ។យើងខ្ញុំ សូមប្រើពាក្យ”អាច” ព្រោះវាកាន់តែអត្ថបទសាកល្បងវិភាគតែប៉ុណ្ណោះ ដោយមិនបានឆ្លុះបញ្ចាំង និងវាយប្រហារចំៗ ទៅលើស្ថាប័នណាមួយឡើយ ។ការបង្ហាញនេះគ្រាន់តែជាការលើកសម្មតិកម្មមួយប៉ុណ្ណោះ ហើយអ្វីៗទាំងអស់គឺក្នុងគោលបំណងដើម្បី ការរៀនសូត្រ និងចែករំលែកចំណេះដឹង បទពិសោធទៅ វិញទៅមក ។

1១- លទ្ធកម្ម

ដើម្បី ទប់ស្កាត់អំពើពុករលួយ គេបង្កើតឱ្យមានការធ្វើលទ្ធកម្ម ដែលមានលក្ខណៈជាប្រព័ន្ធធ្វើការរួមគ្នា ដោយចងក្រងជាគណៈកម្មការលទ្ធកម្ម ធ្វើការប្រជុំពិភាក្សា និងសម្រេច ពីដំណើរការធ្វើលទ្ធកម្ម ។គណៈកម្មការជាអ្នកសម្រេចប្រកាសឱ្យដេញថ្លៃ ការផ្សព្វផ្សាយដំណឹងដេញថ្លៃឱ្យបានទូលំទូលាយ និងធ្វើជាសាធារណៈ ការវិនិច្ឆ័យលក្ខណៈសម្បត្តិ អ្នកផ្គត់ផ្គង់ ឬអ្នកសាងសង់ ការកំណត់កាលបរិច្ឆេទដេញថ្លៃ នីតិវិធីដេញថ្លៃ (ដាក់ស្រោមសំបុត្រ ឬជាសាធារណៈ ) និងការពិភាក្សាសម្រេចជ្រើសរើសរកក្រុមហ៊ុនសមស្រប ។ជាទូទៅនៅក្នុងជួរគណៈកម្មការលទ្ធកម្ម មានជំនាញច្បាស់ណាស់ពីបច្ចេកទេស ដើម្បីកំណត់តម្លៃប៉ាន់ស្មាន ដែលសមស្របតាមបច្ចេកទេស ធានាបានទាំងគុណភាព និងប្រសិទ្ធភាព ។ការកំណត់សម្រេចជ្រើសរើសក្រុមហ៊ុនណាមួយសម្រាប់ផ្គត់ផ្គង់ ជុសជុល ឬសាងសង់ គឺអាស្រ័យដោយនីតិវិធីរបស់គណៈកម្មការ ពេលខ្លះ មិនបានទៅលើក្រុមហ៊ុនដែលដេញថ្លៃទាបជាងគេនោះ ទេ ព្រោះ វាស្ថិតក្រោមការវាយតម្លៃកម្រិតគុណភាព សំណង់ ឬសម្ភារៈដែលសមស្រប តាមតម្លៃប៉ាន់ស្មាន ។បន្ទាប់មកគឺ ការចុះកិច្ចសន្យាការងារ និងផែនការការងារ ។ស្ថិតក្នុងដំណើរការជាប្រព័ន្ធបែបនេះ បើប្រព្រឹត្តអំពើពុករលួយពិតជាពិបាក លុះត្រាតែ ធ្វើជាប្រព័ន្ធដែរ ទើបវាអាចទៅរួច ។បើគណៈកម្មការជាអ្នកសម្រេច ជ្រើសរើសក្រុមហ៊ុន អញ្ចឹង វាងាយស្រួលណាស់ ក្នុងការបង្កើតក្រុមហ៊ុនខ្លួនឯង ព្រោះវាងាយរកបានប្រាក់ចំណេញ ។ជួរគណៈកម្មការប្រហែលជាអាចរស់ពី ការបែងចែកភាគលាភពីសកម្មភាពនេះ ហើយសំណុំឯកសារមិនជាពិបាកទេ ព្រោះអាចសហការគ្នាធ្វើបាន ។មួយវិញទៀត បើមិនមានក្រុមហ៊ុនខ្លួនឯងទេ ក្រុមហ៊ុនផ្សេងដែលដាក់ដេញថ្លៃ ឥឡូវស្រួលណាស់ មិនពិបាកទេ ព្រោះ គេដឹងបរិបទនេះច្បាស់លាស់ប្រហែលជាទុកមួយកញ្ចប់ឱ្យមិនខាន ។មិនតែប៉ុណ្ណោះពួកគេអាចរួមគ្នាបង្កេីតឆាកល្ខោនដេញថ្លៃ ប្ញ ការឃុបឃិតគ្នារបស់ក្រុមហ៑ុនដេញថ្លៃ។

2 ២- សវនកម្ម

ចំណែកឯការធ្វើសវនកម្ម គឺគ្រាន់តែចុះមកសុំ ឬមកកំណត់ភាគលាភ គួរយកប៉ុន្មាន ពីស្ថាប័ននេះ និងគួរយកប៉ុន្មានពីស្ថាប័ននោះ ប៉ុណ្ណោះ ដើម្បីបញ្ចប់បញ្ហា វាពិតជាងាយស្រួលណាស់ ។បើមានករណី នេះកើតឡើង វាគ្រាន់តែប្រែក្លាយ ពីការប្រព្រឹត្តអំពើពុករលួយជាបុគ្គល ឬជនមួយក្តាប់តូច មកធ្វើជាប្រព័ន្ធតែប៉ុណ្ណោះ គ្មានអ្វីខុសប្លែកទេ ។ពិតណាស់ការឆ្លៀតឱកាសកន្លែងនេះ ពិតជាធ្វើឱ្យអ្នកទាំងនោះ ធ្វើមានធ្វើបានដោយងាយ ហើយចំណែកផ្គត់ផ្គង់សម្ភារៈ ការជុសជុល និងការសាងសង់ គឺ ធ្វើដដែលៗ ហើយការងារមានលក្ខណៈបែបពាំត្រណោត ដូចការងារកសាងផ្លូវជាដើម ។

៣- គណនេយ្យ-ហិរញ្ញវត្ថុ

ចំពោះការងារគណនេយ្យ និងហិរញ្ញវត្ថុវិញ អ្នកវិភាគគ្មានប្រាថ្នា អ្វីទេ ក្រៅពីកញ្ចក់ទិព្វដែលពូកែស័ក្តិសិទ្ធ មកឆ្លុះមើលវិក័យប័ត្រចំណាយទាំងអស់ដែលប្រើប្រាស់នៅ ក្នុងខ្មែរ ទាំងស្ថាប័នសាធារណៈ អង្គការសង្គមស៊ីវិល និងផ្នែកឯកជន ទាំងធំ ទាំងតូច ថាតើមានប៉ុន្មាន វាជាវិក័យប័ត្រពិតប្រាកដ?ហើយប៉ុន្មានជារបស់ជប់ឱ្យចេញមក? តើវាច្រើនជាង៥០% ឬតិច៥០% ? តើទៅរកមនុស្សឯណា ឱ្យពូកែស័ក្តិសិទ្ធដូចកញ្ចក់ទិព្វនោះ ?ក្នុងចំណោមផ្នែកទាំងបីមានតែផ្នែកឯកជនប៉ុណ្ណោះ ដែលប្រព័ន្ធគ្រប់គ្រងគណនេយ្យមានភាពច្បាស់លាស់ជាងគេ ។បើក្នុងសតិអារម្មណ៍មនុស្សភាគ ច្រើនស្វះស្វែងរកឱកាសដើម្បី ផលប្រយោជន៍បែបនេះ តើគេត្រូវចំណាយពេលវេលា និងថវិកាប៉ុន្មានទៀតដើម្បីអភិវឌ្ឍន៍ប្រទេស ។ បើមានបញ្ហាដូចរៀបរាប់ខាងលើ តើប្រទេសកំពុងអភិវឌ្ឍន៍មួយនេះត្រូវខាតបង់ថវិកាប៉ុន្មាន ក្នុង១ឆ្នាំៗទៅលើអំពើពុករលួយ ?តើមានមន្រ្តី រាជការ បុគ្គលិកអង្គការសង្គមស៊ីវិល និងផ្នែកឯកជន ប៉ុន្មាននាក់ កំពុងស្វះស្វែងរកភាគលាភតាមរយៈអំពើពុករលួយពីការងារដែលខ្លួនកំពុងទទួលខុសត្រូវ ? តើមានសកម្មភាពកាត់តម្រឹមថវិកា ពីផែនការថវិកាដែរឬទេ? តើមានកូដសកម្មភាពមួយចំនួន ដែលមិនបានអនុវត្តហើយនាំគ្នា រៀបចំសណុំឯកសារ ដែរឬ? បើសង្គមមួយសំបូរទៅដោយសកម្មភាព និងមនុស្សបែបនេះ តើ គេត្រូវមានយុទ្ធសាស្ត្រ អ្វី ដោះស្រាយបញ្ហានេះ ? ការផ្លាស់ប្តូរការគិត របស់មនុស្សទាំងនេះ និងការពង្រឹងប្រព័ន្ធគ្រប់គ្រងគណនេយ្យ ហិរញ្ញវត្ថុឱ្យមានភាព ច្បាស់លាស់ គឺជារឿងបន្ទាន់មួយ។

ជារួម ដំណើររបស់កម្ពុជាកាន់តែមកឆ្ងាយហើយ រីឯជំនួយបរទេសក៏កាន់តែមកច្រើនគួរសមដែរ ការអភិវឌ្ឍប្រកបដោយចីរភាពកាន់តែគ នៅលើតុ ម្ចាស់ជំនួយ ។ ដូច្នេះ ឈប់ចំណាយខ្ជះខ្ជាយទៀតទៅ!ឈប់ដេកលក់ទៀតទៅ! គប្បីប្រើប្រាស់ថវិកាប្រកបដោយប្រសិទ្ធភាពនិង ឱ្យសមនឹងឃ្លាដែលនិយាយថា “ដាក់ទុនតិច បានផលច្រើន” វិញទើបល្អជាង។សកម្មភាពនៃអំពើពុករលួយទាំងនេះ ធ្វើឱ្យអសកម្មដល់ដំណើរអភិវឌ្ឍន៍ប្រទេស ដូចជា៖ ការកើនឡើងនៃគម្លាត រវាងអ្នកមាននិងអ្នកក្រ ភាពអយុត្តិធម៌សង្គម បែកបាក់សាមគ្គឺនិងផ្ទៃក្នុងនៅក្នុងស្ថាប័នការងារ ការបាក់ទឹកចិត្ត ការចុះថមថយនៃឆន្ទៈ និងមនសិការបំពេញការងារ សង្វាក់នៃគំនិតច្នៃប្រឌិតអភិវឌ្ឍន៍ការងារ ឬស្ថាប័ន មិនមានសន្ទុះខ្លាំងក្លារ ប្រែក្លាយទម្លាប់ទៅរកវប្បធម៌ពុករលួយ ស៊ីសំណូកសូកប៉ាន់ .....ដែលកត្តាទាំងនេះជាហេតុផលនាំទៅ រកអសន្តិសុខសង្គម ភាពអាណាធិបតេយ្យ ការធ្លាក់ចុះនៃសីលធម៌សង្គម...។ល។

ដោយៈ ចៅ ឧស្សាហ៍

-ការអនុវត្តខុសនីតិវិធីលទ្ធកម្ម ដូចជា៖ ប៊ិក្ តម្លៃ៣០០៛ ពេលធ្វើលទ្ធកម្មបែរជាតម្លៃ១០០០៛ទៅវិញ។
ចំណាយលុយច្រើនសន្ធឹកសន្ធាប់ធ្វើផ្លូវ ធ្វើហើយខូច ខូចហើយធ្វើដដែលៗចំណាយលុយយ៉ាងខ្ជះខ្ជាយបំផុត។
ធ្វើផ្លូវស្អាតហើយជីក ដាក់លូ ធ្វើដើម្បីតែធ្វើ មិនមានផែនការច្បាស់លាស់។....