រុករកប្លក់នេះ

Loading...

ទស្សនវិជ្ជាៈ សូក្រាត និងពួកសូហ្វីស អ្នកស៊ីឈ្នួលនិយាយនៅក្រុងអាតែន


សូក្រាត
សូក្រាតត្រូវ​បាន​ជនជាតិ​ក្រិច​ចាត់ទុកថា ជាបិតាទស្សនវិជ្ជា ។គាត់ជា​ទស្សនវិទូ​ឥតកែប្រែ ​បាន​សេចក្តីថា​គាត់រស់នៅក្នុង​ទស្សនវិជ្ជា ហើយដល់​ស្លាប់ទៅវិញ ក៏នៅក្នុង​ទស្សនវិជ្ជាដែរ ។​គំនិត​ដែល​គាត់​លើកយក​មក​អនុវត្ត​គីជា​គំនិត​សច្ចៈ ហើយ​មិន​មាន​ជា​សច្ចៈ​ក្លែង​បន្លំឡើយ ។គាត់​ជាទស្សនវិទូ​ដែល​ចូល​ចិត្ត​ឱ្យ​មាន​សេរីភាព​ខាង​ផ្លូវ​កាយ និង​ផ្លូវ​ចិត្ត​ ទុក​ពេល​ទំនេរ​ ដើម្បី​ធ្វើ​ការ​គិត​ពិចារណា​រឿង​សង្គម​មនុស្ស​ ហើយ​គាត់​តែង​និយាយ​ថា “​ម្តាយ​ខ្ញុំ​ជាឆ្មប​សម្រាល​កូន​ ចំណែក​ខ្ញុំ​ជាឆ្មប​សម្រាល​គំនិត​” ។ចំពោះ​វិធី​បង្រៀន​របស់​គាត់​មាន​ពីរ​គឺ​សិល្បៈ​បង្កើត​គំនិត និងការចំអក ។សូក្រាត​ប្រើវិធីបង្កើត​គំនិត ​ចំពោះ​មនុស្សសាមញ្ញ​ដែល​មិនចេះ​អួតអាង​ហើយ​ដឹង​ថា ​​ខ្លួន​​គ្មានចេះ​​អ្វីសោះ ហើយ​គាត់​ធ្លាប់​បង្ហាញ​ដល់​សិស្ស​គាត់​នូវ​វិធី​មួយ​ដែល​មាន​ឈ្មោះ​ថា “ ​ហូត​យក​ចំណេះ​ដឹង​ពី​មនុស្ស​”  ។ឃ្លាចម្បង​របស់​គាត់​​ស្តី​ពី​ទស្សនវិជ្ជា​គឺ​ ខ្ញុំ​ដឹង​តែ​មួយ​មុខ​គត់​ គឺ​គ្មាន​ចេះ​អ្វី​សោះ ។មួយ​វិញទៀត គាត់​បាន​លើក​​ឡើង​ថា “ត្រូវ​ដុស​ខាត់​ព្រលឺង ឱ្យ​បាន​ប្រសើរ​ជាង​ដុស​ខាត់​សរីរៈ និង​ត្រូវ​ជជែក​​គ្នា ដើម្បី រកការពិត​ ព្រោះ​​ការ​ជជែក​ជាវិធី​បង្កើត​គំនិត” ។សូក្រាត​មិន​ត្រឹមតែ​ទស្សនវិទូ​ដ៏ ល្បីលាញ​ប៉ុណ្ណោះ​ទេ ថែមទាំង​ជា​យុទ្ធជន​ដ៏ឆ្នើម​ទៀត​ផង ។គាត់​ស័្មគ្រ​ចិត្ត​ធ្វើ​ពលីកម្ម ប្តូរ​ជីវិត​ខ្លួន​ឯង គឺ​មិនសុខចិត្ត​រត់​ចោល ​សមមិត្ត​រួម​អាវុធ​ក្នុង​​សមភូមិ​ឡើយ ។លើ​សនេះ គាត់​ជា​មនុស្ស​មិន​ចូលចិត្ត​ភាព អយុត្តិធម៌​ទេ ម្លោះ ហើយ ​គាត់​ត្រូវ​តែ​ប្រឆាំង​នឹង​​អំពើ​អាក្រក់​ទាំង​នោះ ជានិច្ច ។​ពាក្យ​​ស្លោក​និង​ភាសិត​​របស់​​​គាត់​​ត្រូវ​បានកត់ទុកបាន​មួយ​ចំនួន​ដូចជា៖ “បុគ្គលណា​ដែល​ចាត់​ទុក​ខ្លួន​ថា​ជា​​ទស្សនវិទូ គឺ​បុគ្គល​នោះ​ជាអ្នក​សាកល្បង រុញ​ខ្លួន​បន្តិច​ម្តងៗ បង្ខិត​ជីវិត​ឱ្យ​ចូល​ទៅ រក​សេចក្តី​ស្លាប់​ ព្រោះ​ហ៊ាន​ធានា​ការ​ពារ​អះអាង​ពី​យុត្តិធម៌ និង​សច្ច​ធម៌ របស់​សង្គម ។កាល​បើ​ហ៊ាន​បញ្ជាក់​ពី​យុត្តិធម៌​ និង​សច្ចធម៌​ ដូច្នេះ​ហើយ​ដែលជា​ទំនាស់​រវាង​ច្បាប់​ និង​ការកាន់​ច្បាប់​ ។​​តើ​ច្បាប់​មាន​លំអៀង​ដែរ​ឬទេ? ច្បាប់​ធានា​ជីវិត​ប្រកប​ដោយ​សច្ចភាព​ដែរ​ឬ​ទេ ?ច្បាប់​បម្រើ ​ទៅ​តាម​គោល​ដៅ​នៃអ្នក​ចង់​បាន​យុត្តិធម៌​ដែរ​ឬទេ ?​” ពាក្យ​ស្លោក​សូក្រាត​នេះ គឺ​គាត់​ចង់​និយាយ​ពី​សច្ចៈ​ និង​យុត្តិធម៌​ ។ទាក់​ទង​នឹង​ទស្សនៈនេះ សិស្សរបស់​គាត់​ប្លាតុង បាន​និយាយ​ថា “ ច្បាប់​នៅក្នុង​ក្រុង​អាតែន​ បញ្ជា​ហាម​ឃាត់​ឱ្យ​ខ្លួន​ខ្ញុំ​រស់​នៅ​ស្ងប់​ស្ងៀម​បាន​ ប៉ុន្តែ​មិនអាច​ធ្វើ​ឱ្យ​ព្រលឹង​វិញាណ​របស់​ខ្ញុំ​ស្ងប់​ស្ងៀម​បាន​ឡើយ​ ហើយ​អ្នក​ក៏​ស្គាល់​ច្បាស់​នូវ​សច្ចភាព​ ដែល​ជាភាព​ផ្ទុយ​ពី​អយុត្តិធម៌ ។ពេល​នេះ ខ្ញុំ​ជួប​អយុត្តិធម៌​ហើយ​ អយុត្តិធម៌​នេះ​ឯង​កំពុង​ទំពារ​ខាំ​ខ្ញុំ​ បង្ខំ​ខ្ញុំ​ឱ្យ​លះបង់​សច្ចភាព​...ខ្ញុំ​ជឿ​ជាក់​ថា សច្ចភាព​ពិត​ជា​ឈ្នះ នៅ ចុង​ក្រោយ​នៃ​ជីវិត​របស់​ខ្ញុំ​ត្រូវ​រលត់ ។” ថ្ងៃ​មួយ​ សូក្រាត​បាន​និយា​យ​ផ្លែផ្កា​ឱ្យ​អ្នក​នយោបាយ​ម្នាក់​ថា៖ “ មនុស្ស​ម្នាក់​ៗ ហើយ​ស្ទើ​រតែ​គ្រប់​គ្នា​ច្រើន​ភាន់​ច្រឡំ​ថា​ខ្លួន​បាន​រៀន​ចេះ​ចប់​សព្វ​គ្រប់​អស់​ហើយ​ តាម​ពិត​មនុស្ស​ដែល​អួត​អាង​ថា​ចេះ​ដឹង​នៅជុំ​វិញ​ខ្ញុំ​នេះ គឺ​គ្រាន់​តែ​ជា​ការ​ហាត់​ពោល​ថា​តាម​ក្បូន​របស់​អ្នក​ប្រាជ្ញជាន់​មុនៗ​មក​ប៉ុណ្ណោះ ។​ឯ​ការ​ពិត​អ្នក​ទាំង​នោះ​ពុំ​ទាន់​យល់​ដឹង​អំពី អាថ៌កំបាំង​នៃ​វិជ្ជា​ជ្រៅៗ​ ខ្ពស់​ប្លែកៗ​ ច្រើន​ស្រទាប់​ណាស់​ ដែ​ល​គេ​នឹក​មិនឃើញ​ យល់​មិន​ដល់ ហើយ​បែរ​ជា​អួត​ខ្លួន​ដោយ​យក​ការ​ល្ងង់​ខ្លៅ​មក​អះអាង​ ថា​ជា​ការ​ចេះ​ដឹង​ទៅ​វិញ ។​ទស្សនៈ​របស់​សូក្រាត​នេះ​ចង់​បញ្ជក់​ពី​ភាព​ស្គាល់​ខ្លួន​ឯង​ដោយ​ខ្លួន​ឯង និង​ត្រូវ​ស្គាល់​ខ្លួន​ឯង​ 
មុន​នឹង​ស្គាល់​អ្វីៗ​​ដទៃ​​ទៀត​ ។អ្នក​នយោបាយ​អគតិ​នោះ​មិន​យល់​ពីទស្សនៈរបស់​សូក្រាត​បែ​រជាខឺង​ជា​ខ្លាំង ហើយ​ចោទ​គាត់​ថា បាន​និយាយ​តិះដៀល​បង្អាប់​គេ ។ជា​ច្រើន​លើក​ច្រើ​ន​សារ គាត់តែង​ប្រឈម​មុខ​ជាមួយ​រដ្ឋ​អំណាច ក្នុង​គោល​បំណង​ព្យាយាម​បញ្ចូល​នូវ​ទស្សនៈ​នយោបាយ​តិះ​ទៀត​ដ៏​ល្បី​ល្បាញ​របស់​គាត់​ ។​ចុងបញ្ចប់​ សូក្រាត​ត្រូវ​បានគេ​​
កាត់​ទោស​ប្រហារ​ជីវិត​ដោយ​ថ្នាំ​ពុល​ពី​បទចោទប្រកាន់​ បំផ្លាញ​យុវវ័យ ហើយ​មិន​ជឿ​លើ​អាទិទេព ទីក្រុង តាមរយៈ​ការ​និយាយ​ញុះ​ញង់​ជាសាធារណៈ ។ស្ថិតក្នុង​ស្ថានភាព​នេះ​ សូក្រាត​មិន​បាន​តក់ស្លុត​និង​សុំ​គេ​ ដើម្បី សម្រាល​ទោស
ឬ​មាន​គំនិត​រត់​គេច​ពី​គុក​ទេ ព្រោះ​គាត់​នៅ តែ​មាន​ជំនឿ​លើ​គោលការណ៍​មិន​រំលោភ​ច្បាប់។ មរណៈ​ភាព​របស់​សូក្រាត​បាន​លេច​​ឡើង​​នូវ​ចំណោទ ជា​ច្រើន​រាប់​មិន​​អស់​ ស្តី​អំពី​ការ​គំរាម​កំហែង​ដល់​បញ្ញា​វ័ន្ត​ដែល​​កំពុង​តែ​ចូលរួម​​ក្នុង​កិច្ចការ​នយោ​បាយ ។​លក្ខណៈ​សម្បត្តិរបស់​សូក្រាត​ខាង​លើ គឺ​ខុស​ពី​ពួក​សូហ្វីស ដែល​ជាសត្រូវ​មាន​គំនិត​ប្រឆាំង​នឹង​ទស្សន​វិជ្ជា​សូក្រាត ។​ជា​និច្ចកាល​ពួកនេះ​តែង​តែ​ព្យាយាម​តាម​ផ្តន្ទា​ឈ្នានីស បង្ក​ហេតុ​រក​រឿង​ បន្តុះ​បង្អាប់​សូក្រាត​ឥត​ឈប់​ឈរ ពោលគឺ​ចង់​បន្ទាប​បន្ថោកទ្រឹស្តី​របស់​សូក្រាត​ឱ្យ​ចុះ​អាប់​ឱន​ជាង​ខ្លួន ។ពួក​សូហ្វីស​បាន​លើក​យក​ឈ្មោះ​សូក្រាត មក​ប្រឌិត​ជា​រឿង​ឥត​ប្រយោជន៍ សម្រាប់​សើច​ចំអក លេង​ជា​ល្បែង ទុក​រូបលោក​ដូច​ជា​កូន​ក្មេង ។ក្នុង​តម្លៃ​សីលធម៌​​សូក្រាត​ជានិច្ច​កាល​ ចេញ​មុខ​ប្រឆាំង​នឹង​ពួក​សូហ្វីស ដែ​លពូកែ​អួត ហើយ​ចូល​ចិត្ត​យក​​ពាក្យ​សម្តី​ទៅ ប្រើ​ផ្លូវ​ខុស និង​ធ្វើ​អាកប្បកិរិយា ដូចជា អ្នក​ចេះ​ដឹង ច្រើន ។ភាគច្រើន​នៃ​ពួក​សូហ្វីស​បាន​អះអាង​ថា អ្វីដែល​យើង​កំណត់​ថា​ត្រឹមត្រូវ​ យុត្តិធម៌ គឺ​គ្រាន់​តែ​ជា​ការ​បង្ហាញតាម​តែ​អំពើ​ចិត្ត​​តែ​ប៉ុណ្ណោះ ។អនុភាព​នៃភាព​ត្រឹម​ត្រូវ​ យុត្តិធម៌ គឺ​កម្លាំង​ដែល​ធ្វើ​ឱ្យ​ជឿ​ តាម​រយៈ​ភាព​ប៉ិនប្រសប់​នៃ​ការ​និយាយ​ និង​អូសទាញ ។ជាទូទៅ ពួក​សូហ្វីស​ជាអ្នក​ស៊ីឈ្នួល​និយាយ ឱ្យ​អ្នក​នយោ​បាយ​ និង​មេធាវីជំរះក្តី ព្រោះ ពួក​គាត់​​មាន​សមត្ថភាព​អាច​និយាយ​ បកស្រាយ​ពី​ខ្មៅ​ ទៅ​ស ឬ​ពី​ស ទៅ ជាខ្មៅ​បាន។គោល​បំណង​អតិថិជន​ពួក​នេះ​ គឺ​ចង់​ឈ្នះតាម​រយៈ​ការ​លើក​ឡើង​នូវ​ហេតុផល​សមស្រប​មួយ មិន​មែន​ចង់​ទទួល​បាន​​ចម្លើយ​ត្រឹម​ត្រូវ​ទេ ។គេ​ត្រូវ​បង់​ថ្លៃ​ឱ្យ​ពួក​នេះ ដើម្បី​ឱ្យ​បង្រៀន​មនុស្ស​ទាំង​ឡាយ​ឱ្យ​ចេះ​និយាយ​ អះអាង និង​បញ្ចុះ​បញ្ចូល ។ជំនាញ​ទាំង​ឡាយ​ ដែល​ពួក​សូហ្វីស​បាន​បង្រៀន គឺ​ល្បិច និង​ឧបាយកលក្នុការ​ពិភាក្សាដេញ​ដោល​ ហើយ​នឹងការបោក ឬ​ការ​បំភាន់​ជាជាង​សិល្បះ ​នៃ​ការ​ធ្វើ​ទឡ្ហីកម្ម ប្រកបដោយ​វិចារណញាណ ។ទោះ​បី​ជា​ពួក​សូហ្វីស ខិត​ខំធ្វើការ​បន្តុះបង្អាប់​សូក្រាត យ៉ាងណាក៏​ដោយ ក៏​ប្រជាជន​ស្ទើរ​តែ​ទាំង​អស់​ នៅតែ​គោរព​ ស្រឡាញ់ទ្រឹស្តី និង​រូប​លោក​​ដដែល ។ជារួម​ មាន​តែ​សូក្រាត​ទេ​ដែល​ជា​ទស្សនវិទូ​ពិតប្រាកដ ស្រឡាញ់សច្ចធម៌​ យុត្តិធម៌ ចំណែកឯ​ពួក​សូហ្វីស​ជា​អ្នក​​ដែល​មាន​សច្ចធម៌​ យុត្តិធម៌ក្លែងក្លាយ ។ពួក​សូហ្វីសនេះ គ្រាន់តែ​អាចបោក​ប្រាស​ និង​ឆក់ឱកាស​យក​ផល​​​ប្រយោជន៍ ពី​ភាព​ឆោត​ល្ងង់​របស់​ជន​មួយ​ក្តាប់​តួច​ប៉ុណ្ណោះ ។​​ក្នុង​ស្ថានភាព​បច្ចុប្បន្ន​ មាន​​អ្នក​ទទួល​បាន​សញ្ញា​ប័ត្រ PhD (PhD=បណ្ឌិតទស្សនវិជ្ជា )ជា​ច្រើន ដែល​មិន​បាន​គិត​ដល់​ពី សញ្ញាប័ត្រខ្លួន​ បាន​ផ្សារភ្ជាប់​នឹង​ពាក្យ​ទស្សនវិជ្ជា ហើយបាន​​អួត​អាង​ខ្លួន​ដូច​ពួក​សូហ្វីស ។អ្នក​ទាំង​នេះ​ បាន​ត្រឹម​តែ បោក​អ្នក​ល្ងង់​ខ្លៅ មួយ​ចំនួន​ប៉ុណ្ណោះ បើ​ជួប​នឹង​អ្នក​ទស្សនវិជ្ជា​ពិត​ដូច​សូក្រាត ពិត​ជា​ខ្ចប់​ជា​មិន​ខាន ។នៅ​ស្រុកខ្មែរ​ បើសំបូរ​មនុស្ស​ដូច​ពួកសូហ្វីស ហើយ​មិន​សូវ​មាន​មនុស្ស​ដូច​សូក្រាតប្រហែលជា អាច​អូស​សង្គម​ឱ្យ​ដើរ​ថយ ពិសេសបើពួកគាត់​ជាអ្នក​កាន់​ក្បាល​មេក្រូ៕
ដោយៈ ចៅ ឧស្សាហ៍ គ្រូកម្រិតឧត្តម

No comments:

Post a Comment

សូមផ្តល់ជាមតិយោបល់នៅចំណុចនេះ!