កំណាព្យៈ និស្ស័យស្នេហ៍កម្ម

linkសម្រាប់​Download https://drive.google.com/open?id=1mQa75DIAOkj172jPJVM0x1CJ16KTyz_I
1-អនិច្ចា!ជីវិតគន់គិតលែងយល់                           រឿងស្នេហ៏អំពល់វិលវល់ខ្វល់ក្រៃ

ស្នេហ៏ធ្លាប់ស្ម័គ្រស្មោះបែរប្រែប្រល័យ                ជាតិនេះស្រមៃក្សិណក្ស័យស្នេហ៏ពិត ។

2-រស់រានសព្វថ្ងៃឥតន័យខ្លឹមសារ                        រឿងរ៉ាវស្នេហាចុកផ្សាជាប់ចិត្ត

រងកម្មរាប់ឆ្នាំប្រចាំជីវិត                                         ស្នេហ៏ឥតអាណិតប្តូរចិត្តមានថ្មី។

3-ស្នេហ៏ធ្លាប់គៀកកិតជិតកាយបង្កើយ                សារសងឆ្លងឆ្លើយសូរ្យសៀងសម្តី

ឥឡូវព្រាត់ឆ្ងាយដូចច័ន្ទផែនដី                              អូនមានគូថ្មី ឫកហីកន្តើយ។

4-អូនបោះបងចោលកណ្តោលកណ្តែង          ​      ដូចលេបគ្រាប់ស្លែងលែងស្តែងស្តីឆ្លើយ

ល្វីងជូរចត់ណាស់ណានឹមនួនអើយ               ជាតិនេះស្គាល់ហើយគេងកើយក្តីទុក្ខ។

5-ស្រែកប្រាប់មេឃមាទាមទារត្រូវខុស          ម្តេចលោកដាក់ទោសឱ្យរស់ឥតសុខ

ខ្ញុំអ្នកស្មោះត្រង់ម្តេចចងចាប់ទុក                  ឃុំឃាំងដាក់គុកកម្មស្នេហ៏លោកីយ៏ ។

6-ហេតុអ្វីចិត្តគេរេរាប្តូរផ្លាស់                        សម្តីគន្លាស់បោកប្រាស់ផ្លាស់ថ្មី

ចាកចោលរូបខ្ញុំទុក្ខធំស្ទើរក្ស័យ                     ចិត្តឥតប្រណីស្រីស្រណោះស្តាយ ។

7-ស្រណោះអឌិតធ្លាប់ជិតជួបជុំ                    ស្រណោះធ្លាប់យំធ្លាប់សើចសប្បាយ

ស្រណោះធ្លាប់គេចពាក្យពេចន៏ពុកម្តាយ        ស្រណោះចិត្តកាយបាយទឹករួមគ្នា ។

8-ស្រណោះពន់ពេកស្រែកយំអង្វរ                 អនុស្សាល្អបវរជានា

ស្រណោះរួមសុខទុក្ខជាមួយគ្នា                    លំបាកវេទនាជិតគ្នាត្រសង ។

9-ស្រណោះសម្តីស្រីថ្លៃវាចា                        ពិតស្មោះស្នេហាជីវានួនល្អង

ស្រណោះទង្វើស្រីធ្វើលើបង                      ស្រណោះកន្លងសូមផ្សងគ្រប់ជាតិ ។

10-ស្រណោះកន្លែងប្រឡែងគ្នាលេង           ស្រណោះបទភ្លេង ភ្លើងភ្លឺព្រោងព្រាត

ស្រណោះអូនរាំអែបបងឥតឃ្លាត                ស្រណោះរសជាតិជក់ចិត្តសប្បាយ ។

11-ស្រណោះក្លិនថ្ពាល់ធ្លាប់យល់ថែថើប       អារម្មណ៏ធ្លាប់ស្រើបស្រួលស្រាលសប្បាយ

កាយធ្លាប់កៀកកិតជិតឥតជិនណាយ           ពេលនេះស្រីឆ្ងាយកាត់កាយពីបង ។

12-ដៃធ្លាប់អង្អែលថ្នមអង្គកាមា                     ស្មារតីហានក្លាទៅណាត្រសង

ហត្ថធ្លាប់ក្រសោបឱបអង្គឃុំគ្រង                  ឥឡូវនួនល្អងចម្លងអ្នកក្រៅ ។

13-បាត់បង់ស្នាមស្នេហ៏ធ្លាប់ថែថ្នមថ្នាក់        ទឹកធ្លាប់ត្រជាក់បែរប្រែជាក្តៅ

មេឃធ្លាប់ស្រទុំប្រែក្រហមឆ្អៅ                     បាយក្លាយជាឆៅទៅជាអង្ករ ។

14-សមុទ្រទឹកសាបក្សោះអស់អំបិល            ព្រៃប្រែរិចរិលលែងស្រស់បវរ

ទឹកហូរបញ្ច្រាសកាត់ផែនដែនថ្ម                  ខ្មៅប្រែជាស ស្ករផ្អែមថែមប្រៃ ។

15-អប្សរារូបស្រស់តែអស់ញញឹម                សត្វធ្លាប់ចិញ្ចឹមតែបែរ ត ដៃ

មនុស្សរស់សោយសុខត្រូវទុក្ខប្រល័យ         ជីវិតមានន័យតែនិស្ស័យកម្ម ។

16-ច្រមុះធ្លាប់ហិត គំនិតធ្លាប់យល់              កាយធ្លាប់ប៉ះពាល់ ចិត្តធ្លាប់ចងចាំ

បេះដូងរំឈួលលោតដួលប្រេះស្រាំ             ភ្នែកឈឺរកាំ ចំណាំលែងបាន ។

17-ត្រចៀកលែងស្តាប់សូរស័ព្ទអ្វីៗ               មាត់លែងនិយាយបាត់បង់អង្គប្រាណ

វិញាណទាំងអស់ស្ទើរក្សោះខកខាន            លែងចង់តាមដានរឿងអូន និងបង ។

18-គេមានអ្វីទៅពាលពៅជ្រើសយក           ហេតុអ្វីពន្លកពន្លិចទូកបង

ឱ្យលង់លិចបាត់កាត់ផ្តាច់ចំណង                 រសាត់សៅម៉ងម្តងហើយម្តងទៀត ។

19-មានអ្វីបណ្តាលចិត្តកន្និថាស្រី                 ទើបភ្លេចអ្វីៗអស់ន័យជូរជាតិ ។

លបលួចប្រហារសាវាល្បិចស្នៀត                ខ្ញុំប្រែចោលម្សៀតមាយាទអ្នកស្រែ ។

20-ស្នេហ៏ខ្ញុំដូចភ្នំធំធេងពេកណាស់             ចិត្តរឹងមានៈជំនះពុកម៉ែ

លះបង់គ្រប់យ៉ាងកសាងស្នាមស្នេហ៏          ស្មោះឥតកែប្រែថ្នមថែស្នេហ៏ពិត ។

21-ឥឡូវបង់បាត់ដូចយប់ស្ងាត់ឈឹង            ផែនដីឈប់ទ្រឹងទឹករឹងរីងឫទ្ធិ

ដូចដឹកដៃដើរក្នុងទីងងឹត                              លង់ផុងគំនិតចិត្តជាប់ចំណង ។

22-ឋានសួគ៌សោយសុខឥតទុក្ខលាយឡំ     បែរប្រែភក់ជ្រាំគ្រាំគ្រាកន្លង

ប្រុសផ្សេងប្រឡាក់ដាក់ធ្នាក់ទាក់ទង            អូនភ្លេចរូបបងសារសងគេវិញ ។

23-ចិត្តស្រីដូចភ្លៀងមិនទៀងទាត់សោះ       ស្នេហ៏ខ្ញុំខំស្មោះគេដោះដូរទិញ

ដកចេញមិនខាតឃាំងឥតចំណេញ            អូនស្នេហ៏គេវិញបងវិលវង្វេង ។

24-ភពផែនដែនដីឥតន័យខ្លឹមសារ              ប្រែប្រួលសាវាស្នេហាកិបកេង

មិនស្ម័គ្រមិនស្មោះដូរដោះលលេង             ទុកស្នេហ៏ដូចលែ្បងលូកលេងប្រហារ ។

25-អស់ឱ!ទេវតាមេត្តាមើលផង                  ទុក្ខធំកន្លងចាប់ចងឱរា

នរណាដោះទុក្ខរស់សុខធម្មតា                     បើក្នុងចិន្តាកត់ត្រាចងចាំ ។

26-ចិត្តចង់បំភ្លេចគេចកែការពិត                  រំដោះជីវិតឈប់គិតរងកម្ម

កាត់កន្ទុយលាបកំបោរចំណាំ                     ថារាប់រយឆ្នាំឈប់ចាំស្រីហើយ ។

27-ប្រាយប្រាប់ខ្លួនឯងពីថ្ងៃនេះទៅ            ឈប់អាល័យនៅត្រូវជាសះស្បើយ

ត្រូវងើបមុខឡើងនិយាយឆ្លងឆ្លើយ             ជាតិនេះហួសហើយគ្មានឡើយស្នេហ៏ពិត៕
និពន្ធដោយៈ ចៅ​ ឧស្សាហ៍ គ្រូបង្រៀនកម្រិតឧត្តម PTTC Svay Rieng