គ្រប់គ្រអប់រំ: នីតិវិធីក្នុងការតំល៉ើងតួនាទី ឋានៈរបស់មន្ត្រីរាជការស៊ីវិលបច្ចុប្បន្ន អាចបំផ្លាញចិត្តសាស្រ្តក្នុងស្ថាប័នការងារ

Friday, July 5, 2013

នីតិវិធីក្នុងការតំល៉ើងតួនាទី ឋានៈរបស់មន្ត្រីរាជការស៊ីវិលបច្ចុប្បន្ន អាចបំផ្លាញចិត្តសាស្រ្តក្នុងស្ថាប័នការងារ

ការតំល៉ើងតួនាទីឋានៈរបស់មន្រ្តីរាជការស៊ីវិលនៅតាមស្ថាប័នសាធារណៈ មានសារៈសំខាន់ក្នុង

ជំរុញសង្វាក់នៃការអនុវត្តការងារ និងលើកទឹកចិត្តមន្រ្តីរាជការស៊ីវិលក្នុងការបំពេញការងារប្រកបដោយប្រសិទ្ធភាព និងភាពស័ក្តសិទ្ធ។ការជ្រើសរើសបេក្ខភាពដែលមានលក្ខណៈសម្បតិ្តគ្រប់គ្រាន់សមស្របនឹងមុខតំណែងគឺជារឿងចាំបាច់ដែលគេត្រូវយកចិត្តដាក់ ដើម្បីរក្សាបានស្ថេរភាពការងារ បរិស្ថានការងារល្អ កិច្ចសហការនិងទំនាក់ទំនងល្អ និងវឌ្ឍនភាពនៃការអនុវត្តការងារ ព្រមទាំងសម្រេចបាននូវលទ្ធផលតាមការគ្រោងទុកគួរជាទីមោទនៈ។ ដើម្បីឱ្យដំណើរការនៃការបំពេញការងារនៅតាមស្ថាប័នមួយចំនួន មានភាពរលូន និងមានភាព រីចម្រើន ការប្រើប្រាស់នីតិវិធី សម ស្របក្នុងការតំល៉ើងតួនាទីឋានៈ គឺជាគន្លឹះសំខាន់ក្នុងលើកកម្ពស់ប្រសិទ្ធភាពនៃការអនុវត្តការងារ និងអភិវឌ្ឍន៍ធនធានមនុស្សសម្រាប់ជាគ្រឹះនៃការអភិវឌ្ឍប្រទេស។មន្រ្តីរាជការស៊ីវិលជាអ្នកធ្វើការបម្រើរាស្រ្ត និងរដ្ឋ បើពួកគាត់ពេញចិត្ត មានមនសិការការងារ និងសមត្ថភាពគ្រប់គ្រាន់ពេញលេញ តាមរយៈនៃបំពាក់បំប៉ន និងការលើកទឹកចិត្តនានា នាំឱ្យការអនុវត្តការងារប្រកបដោយជោគជ័យ ហើយប្រជាពលរដ្ឋ និងប្រទេសជាតិមានការរីកចម្រើនសំបូរសប្បាយជាក់ជាមិនខាន។ស្ថិតក្នុងស្ថានភាពមួយចំនួននៅក្នុងស្ថាប័នសាធារណៈបច្ចុប្បន្ន ដំណើរការតំល៉ើងតួនាទីឋានៈតាមរយៈការជ្រើសតាំង បានផ្តល់ផលអវិជ្ជមានមួយចំនួនដល់បញ្ហាចិត្តសាស្រ្តការងាររបស់មន្រ្តីរាជការមួយចំនួនផ្សេងទៀតនៅក្នុងស្ថាប័នការងារតែមួយ ។ចំពោះបញ្ហានេះ អ្នកវិភាគសូមធ្វើការសាកល្បងបកស្រាយ តាមការសង្កេត និងវិនិច្ឆ័យមិនផ្លូវការ ដោយគ្រាន់តែផ្តល់ជាគំនិតយល់ឃើញប៉ុណ្ណោះ មិនមានឧបករណ៍ស្រាវជ្រាវច្បាស់លាស់ទេ។ ជាទូទៅ មន្ត្រីរាជការដែលបំពេញការងារនៅ តាមស្ថាប័នសាធារណៈនីមួយៗភាគ ច្រើន សុទ្ធតែត្រូវការលើកទឹកចិត្តតាមរយៈការតំល៉ើងតួនាទីឋានៈ ការសរសើរ និងការផ្តល់រង្វាន់ផ្សេងៗ ។មន្ត្រីរាជការមួយចំនួន នៅក្នុងស្ថាប័នមួយចំនួន បានយកលក្ខណៈសម្បត្តិខ្លួនឯងដូចជា៖ អតីតភាពការងារយូរ សញ្ញាប័ត្រខ្ពស់ មានចំណេះដឹងនិងបទពិសោធច្រើន ប្រឹងប្រែងការធ្វើការងារយូរមកហើយ... ទៅធៀបនឹងផលប្រយោជន៍ដែលសមទទួលបាន ហើយសម្លឹងមើលនូវគុណវិបត្តិរបស់អ្នកដទៃ ដែលជាហេតុធ្វើឱ្យម្នាក់ៗប្រកួតប្រជែងដើម្បីទទួលបានផលប្រយោជន៍នោះ ដូចជា៖ ការតំល៉ើងតួនាទីឋានៈ និងការទទួលបានលាភសក្ខារៈផ្សេងៗ។មិនថានរណាទទួលបានផលប្រយោជន៍នេះទេ សុទ្ធតែជះឥទ្ធិពលអវិជ្ជមានទៅអ្នកធ្វើការដទៃផ្សេងទៀត ដែលជំរុញឱ្យមានភាពល្អក់កករនៅក្នុងទំនាក់ទំនងការងារ និងភាពច្រណែនកើតឡើង ព្រោះអ្នកទាំងអស់នោះ សុទ្ធតែយល់ថា ខ្លួនឯងគួរតែឡើងធំ។ ទាំងអស់នេះ ដោយសារភាពមិនអស់ចិត្ត ភាពគ្មានតម្លាភាពនៃការតំល៉ើង ភាពមិនទុកចិត្តគ្នាពីការងារក្រោមតុ និងការប្រកួតប្រជែងគ្នាដាច់បង្ហៀរពេកក្នុងការដណ្តើមអំណាច និងតួនាទី។ស្ថិតក្នុងស្ថានភាពនេះ មន្រ្តីរាជការទាំងនោះ បើទោះជាការពិតបានកើតឡើងហើយក៏ដោយក៏បានប្រែក្លាយពួកគេទៅជាមនុស្សមុខពីរ ក្នុងទំនាក់ទំនងការងារក្នុងស្ថាប័ន។ចំពោះអ្នកដែលមិនទទួលបានផលប្រយោជន៍នេះ នឹងកកើតនូវភាពច្រណែន ដែលនាំឱ្យកើតមាននូវភាពអសកម្ម ក្នុងការបំពេញការងារ ឬបាត់បង់ឆន្ទៈក្នុងការបំពេញការងារ ដែលជាចំណុចគួរឱ្យព្រួយបារម្ភបំផុតសម្រាប់អនាគតនៃវាសនាប្រទេសជាតិ ។ចំណុចសំខាន់មួយទៀត ដែលបំពុលធ្ងន់ធ្ងរបំផុតដល់ស្ថាប័នការងារនោះ គឺវប្បធម៌វែកដំបូល ដែលមិនគួរឱ្យកើតមានសោះ ។ស្ថិតក្នុងស្ថានភាពនេះ តើគេមានយុទ្ធសាស្រ្តអ្វីដើម្បីកែលម្អនីតិវិធីក្នុងការតំល៉ើងតួនាទី ឋានៈរបស់មន្ត្រីរាជការស៊ីវិលដែលមើលទៅត្រឹមត្រូវ មានយុត្តិធម៌ តម្លាភាព និងអាចទទួលយកបាន?បើការឡើងតួនាទីបានការសូកលុយ ឬបក្សពួកនិយម ខ្សែរនិយម វានឹងបំផ្លាញចិត្តសាស្ត្រស្ថាប័នការងារទាំងស្រុងដែលធ្វើសង្វាក់ និងសន្ទុះនៃការអនុវត្តការងារមានការអភិវឌ្ឍយឺត ហើយអ្នកដែលទទួលបានតំណែងដោយការចំណាយលុយសូកគេ នោះគេនឹងក្លាយជាមេដឹកនាំដែលពុករលួយជាក់ជាមិនខាន! បើនីតិវិធីនៃការតំល៉ើងតួនាទី មុខតំណែងតាមរយៈការប្រឡងប្រជែង ប្រកបដោយភាពត្រឹមត្រូវ យុត្តិធម៌ និងតម្លាភាព តើធ្វើឱ្យពួកគាត់អស់ចិត្តឬអត់?????

វិភាគដោយ៖ ចៅ ឧស្សាហ៍